Neg’ri Salawar

Sanang apalai kalo katong hidop dalang Neg’ri yang laeng dar laeng,..
Pamarenta su parsis deng barang yang seng parna apaker,..
Lebe jao biji mata ni banganga ,..macang lebe mooi ka,..
Lebe bongkar akang panggal-panggal ,..macang lebe bagus ka,..
Ado e e,..
Beta pung Neg’ri ni seng ada lawang,..
Co mangente akang ,..lebe banya jiku ,..lebe banya lai yang bajiku ,...
Ha ha e,..paleng gaga paskali ..
Kewang hononuri deng baoplek sabarang ,..
Bapakamponang ,..
Seng tau mo kamana donci kabanarang tabawa ,..paleng talamburang ,..
Pung susa mawe akang neg’ri ni ,...skrek bamara ,....iskrek lai loga-loga ,..
Paleng susa mangarti akang ,..
Ayoo hawater ..e e ,..
Beta sampe su balupa voor batanya,...basudara dong dar Maluku lai ka ..?
Kalo iyo ,..bararti katong bado ,..!
Iko batul katong musti sanang pung Neg’ri ni,..
Bagimana seng sanang ..? musti sanang kio,..sanang deng pamarenta pung tabiat,..!
Katorang samua su tau ,..
Pung susa e bacakar Bapa raja deng Saniri neg’ri pung mura hati ,......
Bagimana seng susa basudara e ,...Bapa Raja pung kadera sa dong jual bali akang,..
Baku tawar kiri kanang,..macang orang dagang bali cengke,..
Katorang jua su tau ,..
Sakarang,..pung susa apalai bacari Bapa Raja deng saniri yang kalesang kampong...???
Maar kalo ada ,..
Mangkali cuma sapanggal sa dar samua yang katorang lia ,...
Sisa seng tau takisu kamana jiku,..
Balur dar blakang reben oto sa su jarang ,…apalai mo manjura lia kampong,..?
Sio,..orang-orang mulu pleces banya lawang,..
Su seng ada lai yang mo pastiu mangente kampong ni,..
Samua su ancor talamburang,..!
Basudara e,..katorang musti biking tugu ,..iyo..tugu kabanarang..
Biking voor kas inga ana cucu beso lusa,..
Kas inga dorang,..kalo katong neg’ri ni pung kabanarang parna takor..!

penulis ; Chrystho Phyl