Tarewas Voor Cinta

Beta bajalang deng mimpi sapanggal di ujung jalang,…
Kalalerang,…taputar macang apiong,….seng dapa jalang,….
Bacakar tampa voor baspull dalang hati yang su ancor talamburang,…
Takisu dalang rumpu-rumpu,…beta pung cinta seng pung tanuar,…
Tali hulaleng ika beta pung kaki,….seng bisa balari lai,….!!
Kahidupan su oleng macang parahu dapa hantang dar omba,.. pata semang,….!!
Tagantong sama deng lambayang sontong,…..seng napas,…
Mangkali, beta sala basar su tulis ale pung nama deng potlot cinta dalang hati,…..
Mangkali beta onosel,… su nganga ale pung dalang mata,…
Mangkali beta sala,… su mangkera talalu labe,…..!!
Beta cuma bisa tarima sa,….maar pikirang seng tado paskali,….
Dalang hati tatutup sama deng kamu-kamu amper malang di badang gunong,…
Kabor,…seng dapa lia apa-apa ,….dalang mulu taprop macang dapa palester,….
Seng sangka akang samua musti jadi voor bagini,…
Seng tau mau bilang voor sapa,….
Cuma bisa batanya dalang hati,….
Mangapa sampe beta pung rasa macang bagini lai,…??
Mangapa rasa saki ni balong-balong abis lai,…???
Seng tau cinta ni mau taru akang ka mana jiku…
Dalang muka seng kuat voor angka akang sadiki lai……
Seng tau beta masi bisa voor bage cinta lai kaseng,….!!
Carita cinta seng ada arti…akang cuma manis di bibir sa,…
Jantong macang dapa cincang kalo inga akang,….padis,…manganta,…
Manganta sampe dalang ulu hati,…!!!
Kalo beta bakaca,..amper voor sabang hari ale pung muka akang kantara,…
Beta su coba voor lupa samua,….maar seng bisa paskali,..
Hati seng bisa voor tabale dar ale,…
Hati ni su takandas cuma voor ale sa,….akang su tarika ancor panggal,…
Ulang paleo akang basena tarus,….seng bisa lawang,…
Tar sadar,….maar beta su tacolo dalang peci aer mata,….balandong,…!!
Mata bangka sama deng ada dapa bilolo,…..padede tar barenti,..!!
Beta cuma kunang-kunang yang talalu gampang ilang dalang bulang galap,…
Beta tau,..beta seng labe dar daong katapang karing,….
Gampang tarbang kalo anging tiop akang,….seng barguna,…!!
Kalo samua jadi ni karna beta,…beta minta ampong jua,….
Jang mara kalo beta su manyuat talalu banya,….
Jang tingkai deng beta kalo su biking ale lala hati,…!!
Tutu ale pung mata la bataria seng kanal beta voor samua orang sa,…
Bataria voor samua orang kalo beta pung nama sa ale seng tau,….
Kalo bisa,..jang cuma voor samua orang sa,…
Bataria akang voor ale pung diri lai,…voor ale pung dalang hati tu lai,…!!
Bataria kalo beta seng bole molo di ale pung dasar hati…..
Bataria lai…tarewas akang kuat-kuat…..
Tarewas,…kalo beta seng pas tarima ale pung cinta,…!!!!!!

Oleh : Chrystho Phyl